विराटनगर । विराटनगर–४ नोबेल मेडिकल कलेज अगाडि रहेका १८ वटा फार्मेसीका सञ्चालक अनुगमन टोली पुग्दा आइतबार पसल बन्द गरेर फरार भए । औषधी व्यवस्था विभाग विराटनगर शाखा कार्यालयको नेतृत्वमा निस्किएको टोली आउने बुझेपछि सञ्चालकहरु फरार भएका हुन् ।
औषधी पसलहरूमा मनोमानी र बिकृति बढेको जनगुनासो आएपछि औषधी व्यवस्था विभाग विराटनगरका प्रमुख संजिव शर्मा कट्टेलको नेतृत्वमा फार्मेसीको अनुगमन भइहरको छ । आइतबार टोलीले विराटनगर अस्पताल (विराट नर्सिङ्ग होम) भित्रको फार्मेशीसहितको आधा दर्जन औषधी पसल अनुगमन गरेपछि नोबेल पुगेको थियो । अनुगमन टोली आएको पत्तो पाएलगतै फार्मेशी सञ्चालकहश्र फरार भएका हुन् ।
अनुगमन टोली आएको जानकारी पाएपछि शिव पावर्ती फार्मेशी, कोहिना मेडिकल हल, धनुषा फार्मेशी, बुढासुब्बा फार्मेशी, कास्मि फार्मेशी, सिद्धार्थ फार्मेशी, सुजता फार्मेशी, चाहना फार्मेशी, सहलेश मेडिकल हल छन् । यस्तै समर फार्मेशी, किर्पा फार्मेशी, जोया फार्मेशी, शान्ता फार्मेशी, परिचय फार्मेशी, जनता मेडिको, जस्मित फार्मेशी, सिरहालि फार्मेशी र हरीहोम मेडिकल हल अनुगमन टोली आएको देखेपछि फरार भएको औषधी व्यवस्था विभाग विराटनगरका फार्मेशी निरीक्षक दिपेन्द्र खड्काले जानकारी दिनुभयो ।
‘अनुगमन टोली आएको देखेपछि सटर बन्द गरि सञ्चालक फरार भए,’ फार्मेशी निरीक्षक खड्काले भन्नुभयो, ‘बन्द गरेको फार्मेशीलाई एक साताभित्रमा औषधी व्यवस्था विभागको शाखा कार्यालयमा उपस्थित हुन पत्र काट्ने छौं । उपस्थित नहुने फार्मेशीलाई कारवाहीको दायरामा ल्याउछौं ।’
औषधी विक्री गर्न पसलमा अनिवार्य ‘फार्माशिष्ट’ पढेको व्यक्ति हुनुपर्दछ । तर, नोबेल अगाडिका अधिकांश व्यवसायीहरूले फर्माशिष्ट नराखी औषधीको बिक्री वितरण गर्ने तथा औषधी व्यवस्था विभागमा दर्ता नभएको औषधी विक्री गर्ने गरेकोले सञ्चालक फरार भएको स्रोतले बताएको छ । ‘फार्मेशी क्षेत्रमा बिकृति बढेको जनगुनासो आएपछि अनुगमनमा हिडेका थियौं,’ औषधी व्यवस्था विभाग विराटनगरका प्रमुख कट्टेलले भन्नुभयो, ‘नोबेल अगाडिका अधिकाशं फार्मेशीहरू बन्द गरेर फरार भएकोले उनीहरुले कुनै न कुनै कमजोरी गरेका स्पष्ट भएको छ । सबैलाई पत्र काटेर कार्यालयमा अनिवार्य उपस्थित गराउँछौं ।’
नोबेललाई आफ्नै फार्मेशी राख्न निर्देशन
अस्पताल फार्मेशी निर्देशिका अनुसार अस्पताल आफैले औषधी पसल सञ्चालन गरिनुपर्ने मापदण्ड छ । तर, विराटनगरस्थित नोबेल मेडिकल अस्पतालले महङ्गो भाडा लिएर दुई वटा फार्मेशी सञ्चालन गर्न दिएको छ । सुस्वास्थ्य फार्मेशी र मेडिकियन फार्मेशी सञ्चाल निर्देशिका विपरित भएको भन्दै विभागले नोबेललाई आफ्नै फार्मेशी सञ्चालन गर्न निर्देशन दिएको हो ।
‘अस्पताल निर्देशिका अनुसार आफ्नै फार्मेशी हुनुपर्दछ,’ औषधी व्यवस्था विभाग विराटनगरका प्रमुख कट्टेलले भन्नुभयो, ‘६ महिनाभित्रमा अस्पताललाई आफैं फार्मेशी सञ्चालन गर्न निर्देशन दिएका छौं ।’
दुई वटा फार्मेशी बन्द
अनुगमन टोलीले विराट नर्सिङ्ग होमका दुई वटा फार्मेशी बन्द गराएको छ । मापदण्ड अनुसार सञ्चालन नगरेको दुई वटा फार्मेशी आइतबार बन्द गरिएको हो । समर फार्मेशी र सिंहदेवी फार्मेशी बन्द गरिएको विभागका फार्मेशी निरीक्षक खड्काले जानकारी दिनुभयो । उहाँका अनुसार समर फार्मेशीमा फर्मालिष्ट पढेका व्यक्ति नराखी औषधी बिक्री वितरण गरेको पाइएपछि बन्द गरिएको हो । सिंहदेवी फार्मेशी मापदण्ड अनुसार सञ्चालन नभएको पाइएपछि बन्द गरिएको छ ।
तर, औषधी व्यवस्था विभागले फार्मेशी बन्द गरेर गएको दुई घण्टा बित्न नपाउँदै व्यवसायीले पुनः पसल खोलेको पाइएको थियो ।
