विराटनगर / मोरङमा आज (सोमबार) बिहान तीन घण्टाको अवधिमा कोरोना भाइरस सङ्क्रमित छ जनाको मृत्यु भएको छ ।
विभिन्न अस्पतालमा उपचार गराइरहेकामध्ये दुई वृद्धासहित तीन महिला र तीन पुरुषको मृत्यु भएको हो । बूढीगङ्गा गाउँपालिकाको विराट शिक्षण अस्पतालमा तीन, विराटनगरको नोबेल शिक्षण अस्पतालमा दुई र न्युरो अस्पतालमा एक सङ्क्रमितको मृत्यु भएको हो । मृतकमध्ये पाँच जना प्रदेश १ र एक जना प्रदेश २ का बासिन्दा हुन् ।
न्युरो अस्पतालमा विराटनगर महानगरपालिका–११ की ६७ वर्षीया वृद्धा महिलाको बिहान ५ः५० बजेतिर मृत्यु भएको छ । उपचारकै क्रममा उनको मृत्यु भएको हो । पीसीआर परीक्षण गराउँदा कोरोना पुष्टि भएपछि उनलाई उपचारका लागि आइतबार अस्पताल भर्ना गरिएको थियो । अस्पतालका अनुसार मृतकमा श्वासप्रश्वासको समस्या पनि थियो ।
त्यस्तै विराटमा विराटनगर–११ का ४६ वर्षीय सङ्क्रमित पुरुषको बिहान ७ः५५ बजेतिर मृत्यु भएको छ । कोरोना पुष्टि भएपछि उनलाई उपचारका लागि वैशाख २० गते भर्ना गरिएको थियो । उपचारकै क्रममा आइसोलेसनमा उनको मृत्यु भएको विराटका कोभिड अस्पताल इन्चार्ज सुनिल देवले जानकारी दिए ।
विराटनगर–१३ की ७८ वर्षीया वृद्धा महिलाको पनि विराटमै मृत्यु भएको छ । कोरोना परीक्षण रिपोर्ट पोजिटिभ आएर स्वास्थ्यमा समस्या देखिएपछि उनलाई उपचारका लागि वैशाख १७ गते अस्पताल भर्ना गरिएको थियो । उनको बिहान ५ः१५ बजेतिर मृत्यु भएको जानकारी देवले दिए ।
सुनसरीको दुहवी नगरपालिका–११ का ३८ वर्षीय पुरुषको पनि विराटमै उपचारका क्रममा मृत्यु भएको छ । कोभिड अस्पताल इन्चार्ज देवका अनुसार बिहान ५ः३० बजेतिर उनको मृत्यु भएको हो । कोरोना रिपोर्ट पोजिटिभ आएपछि उनलाई उपचारका लागि वैशाख १९ गते भर्ना गरिएको थियो ।
सुनसरीको बराहक्षेत्र नगरपालिका–११ की ३५ वर्षीया महिलाको बिहान ५ बजेतिर नोबेल शिक्षण अस्पतालमा मृत्यु भएको छ । अस्पतालका प्रबन्धक नारायण दाहालका अनुसार कोरोना पुष्टि भएकी महिलालाई वैशाख २४ गते उपचारका लागि भर्ना गरिएको थियो ।
त्यस्तै सिरहाको भवानीपुर– ४ का ५० वर्षीय पुरुषको पनि मृत्यु भएको छ । उपचारका क्रममा बिहान ५ः१५ बजेतिर नोबेलमै उनको मृत्यु भएको प्रबन्धक दाहालले बताए । उनका अनुसार कोरोना पुष्टि भएपछि उनलाई उपचारका लागि वैशाख २४ गते भर्ना गरिएको थियो ।
