दुहबी / सुनसरीको दुहवी नगरपालिका १ प्रास्टोकी र इटहरी उपमहानगरपालिका १३ खनारमामा हुन लागेको मुस्लिम धर्म सभा प्रवचन इज्तेमालाई सुनसरी प्रशासनले स्विकृत नदिने भएको छ ।
गृह मन्त्रालयको च.न.८५९ बाट प्राप्त पत्रको आदेश बमोजिम सुनसरी प्रशासनले धार्मिक सभालाई स्विकृती नदिने निर्णयमा पुगेको हो । इजाजतका लागि कार्यालयमा प्राप्त निवेदनका आधारमा जिल्ला प्रशासन कार्यालय सुनसरीले कार्यक्रमका बारेमा गृह मन्त्रालयसंग राय माग गरेको थियो ।
गृह मन्त्रालयले हालको सुरक्षा संवेदनशीलताका कारण कार्यक्रम स्थगन गर्नु, गराउनु भनी आदेश सहितको पत्राचार गरेकाले दुवै स्थानका धार्मिक सभा इज्तेमालाई स्विकृत नदिने निर्णय गरेको सुनसरीका प्रमुख जिल्ला अधिकारी हुमकला पाण्डेले बताउनुभयो ।
गृहको आदेश बमोजिम जिल्ला स्थित सुरक्षा समितिको बैठक बसी तत्काललाई कार्यक्रमका हकमा स्विकृति नदिने निर्णय गरेको प्रजिअ पाण्डेले जानकारी दिनुभयो । गृह मन्त्रालयको आदेश कार्यान्वय गर्नु र गराउनु प्रमुख दायित्व भएकाले सोही बमोजिमको निर्णय गरिएको सुनसरी प्रशासनले जनाएको छ ।
जिल्ला प्रशासन कार्यालय सुनसरीले कार्यक्रम स्थगन बारे इटहरी उपमहानगरपालिका र दुहवी नगरपालिकालाई लिखित जानकारी समेत गराइ सकिएकोे र आयोजक पक्षलाई समेत सो बारे जानकारी दिइएको उहाँले बताउनुभयो ।
कार्यक्रम स्थगत गर्न आदेश भएकाले सोही बमोजिम गर्न आयोजक समक्ष आग्रह समेत गरेको सुनसरी प्रशासनले जनाएको छ । आयोजक पक्षले सोही बमोजिम कार्यक्रम स्थगन गर्नेमा विश्वस्त रहेको प्रशासनले जनाएको छ । स्विकृती बिना कुनैपनि कार्यक्रम संचालन गर्न नपाइने स्पष्ट पारेको छ ।
सुनसरीको खनारमा मंसिर ५ देखि ७ र दुहवीमा ७ देखि ९ गते सम्म इज्तेमा कार्यक्रम आयोजना गर्न लागिएको थियो । छोटो दुरीमै र समय समेत मिल्दोजुल्दो हुनेगरी दुहवी र खनारमा एकसाथ दुई फरक समूहले इज्तेमाको आयोजना गर्न लागेका थिए ।
प्रशासनको स्विकृती बेगर नै कार्यक्रमका लागि आयोजकले तिव्र तयारी थालेका थिए ।
इटहरी १३ खनारको दाँजोमा दुहवी १ मा तयारी गरिएको इज्तेमा ठूलो हुने अपेक्षा गरिएको थियो ।
दुहवीमा आयोजना गर्न लागिएको इज्तेमाका लागि ४० विगाह बढी क्षेत्रफलमा पण्डाल निर्माण गरिएको छ । उक्त कार्यक्रममा सहभागीताका लागि भारत, पाकिस्तान र बङगलादेशका मुस्लिम अगुवा र प्रतिनिधि आइसकेका छन् ।
अन्य देशबाट समेत कार्यक्रममा सहभागीता जनाइने बुझिएको थियो धार्मिक सभाको भारतबाट आएका मुस्लिम धर्मगुरुले प्रवचन दिन कार्यक्रम रहेको थियो ।
