विराटनगर / कोशी प्रदेशसभाका सदस्यहरुले छोराछोरी, बुहारी ज्वाइँ र नजिकका आफन्तलाई स्वकीय सचिवमा नियुक्त गरेको पाइएको छ ।
कोशी प्रदेशसभाका पदाधिकारी तथा सदस्यको सुविधासम्बन्धी ऐन २०७५ ले प्रदेशसभा सदस्यलाई एक जना स्वकिय सचिव राख्न पाउने व्यवस्था गरेको छ । सो व्यवस्थाअनुसार नायव सुब्बा बराबरको तलब तथा सेवा सुविधा पाउने गरी प्रदेशसभा सदस्यहरुले छोराछोरी, ज्वाइँ, बुहारी र नजिकका आफन्तलाई स्वकीय राखेका छन् ।
सूचना हक प्रयोग बाट प्राप्त गरेको दस्ताबेजमा ४ जना प्रदेश सभा सदस्यले आफ्नै छोरालाई तलब भत्ता खुवाउने गरी स्वकीय सचिव नियुक्त गरेको भेटिएको छ । एक जना प्रदेश सभा सदस्यले छोरी, एक जनाले ज्वाँई र एक जना प्रदेश सभा सदस्यले बुहारीलाई स्वकीयमा नियुक्ति गरेको भेटिएको छ ।केहीले भने नजिकका आफन्तलाई स्वकीय बनाएर जागिर खुवाउन थालेका छन् ।
स्वकीयमा नियुक्तहरूले पुसदेखि तलब खान थालेका छन् । उनीहरूले मासिक ३४ हजार रुपैयाँ तलब खाने गर्छन् । यसरी छोरालाई स्वकीयमा नियुक्त गर्ने प्रदेश सभा सदस्य हुन् सुनसरी क्षेत्र नम्बर ३ (१) बाट विजयी रोहित बहादुर कार्की । एमालेबाट विजयी भएका कार्कीले छोरा प्रह्लाद कार्कीलाई स्वकीय नियुक्त गरेका हुन् । उनलाई स्थानीय पार्टी कमिटीले छोरालाई स्वकीय नराख्न समेत भनेको थियो । तर पार्टीले भन्दा भन्दै पनि उनले छोरा प्रल्हादलाई स्वकीय राखेर तलब सुबिधा खुवाउन थालेका छन् ।
यस्तै एमालेबाट निर्वाचित प्रदेश सभा सदस्य उमाकान्त गौतमले पनि कान्छा छोरा प्रज्वल गौतमलाई स्वकीय सचिव बनाएका छन् । गौतम मोरङ क्षेत्र नम्बर १(२) बाट निर्वाचित भएका हुन् । यस्तै माओवादीबाट निर्वाचित कोसी प्रदेश सभा सदस्य नारायण बुर्जा मगरले पनि माइलो छोरालाई स्वकीय नियुक्त गरेका छन् । उनका छोरा चित्रबहादुर बुर्जा मगर हुन् । उनी आफैँले आफू नारायण बुर्जा मगरको स्वकीय भएको बताए । माओवादी केन्द्रबाट निर्वाचित प्रदेश भा सदस्य बुर्जा मगरले स्वकीयमा होम बस्नेतलाई राखेको बताए ।
उनले भने,‘ होमको प्लस टु पास गरेको डकुमेन्ट भएन उसलाई तलब खुवाउनका लागि छोराको डकुमेन्ट पेस गरेको हुँ । अरूलाई स्वकीय बनाउँदा होमले तलब खान नपाउने भएकाले संसद् सचिवालयमा छोराकै कागजात पेस गरेको हँ । छोरालाई तलब खुवाएको छैन ।’
यस्तै एमालेबाट प्रदेश सभामा समानुपातिक तर्फबाट सदस्य भएका झापाका नम्बर लाल धिमालले पनि छोरा सूर्यप्रकाश धिमाललाई स्वकीय नियुक्त गरेका छन् । यसै गरी प्रदेश सभाका ज्येष्ठ सदस्य गयानन्द मण्डलले भने आफ्नै ज्वाँइैलाई स्वकीयमा नियुक्त गरेर तलब भत्ता खुवाउन थालेका छन् । मोरङ क्षेत्र नम्बर ५ (१) मा काङ्ग्रेसबाट निर्वाचित मण्डलले ज्वाँई गजराज मण्डललाई स्वकीय नियुक्त गरेका हुन् ।
नेपाली कांग्रेसकी समानुपातिक सांसद सुनसरीकी सुनिताकुमारी गुरुङ रामले पनि छोरी शुष्मा रामलाई स्वकीय बनाएकी छन् । डोमी रामसँग विवाह गरेकी सुनिताले रामकी अर्की श्रीमती तर्फकी छोरीलाई स्वकीय बनाएकी हुन् । स्वकीय शुष्माले आफूहरू आफन्त नभएको दाबी गरे पनि बुबा भने डोमी भएको बताइन् । मङ्सिर १६ गते सामाजिक सञ्जालमा सुनिताको फोटो राख्दै शुस्माले सांसद हुनु भएकोमा बधाई छ मम्मी लेखेकी छन् ।
कानूनले छोरा छोरी स्वकीय राख्न नपाउने व्यवस्था नगरे पनि राज्यकोको सुबिधा लिने गरी आफन्तलाई नियुक्त गरिनु नैतिकताको प्रश्न भएको नेपाली काङ्ग्रेसबाट समानुपातिक तर्फबाट प्रदेश सभा सदस्य भएकी खगेश्वरी पौडेलले बुहारीलाई स्वकीय बनाएकी छन् । उनले बुहारी अस्मिता तिम्सिनालाई स्वकीय बनाएकी हुन् । अस्मिताले आफू खगेश्वरीको बुहारी भएको स्वीकार गरिन् ।
झापाका सांसद भूमि प्रसाद राजवंशीले भतिजी बुहारीलाई स्वकीय सचिवमा नियुक्त गरेका छन् । उनका भतिज इन्द्र राजवंशी हुन् । सांसद लखी कुमारी गणेश आफ्नै परिवार भित्रको सदस्यलाई स्वकीयमा नियुक्त गरेकी छिन् । लखीकुमारीका स्वकीय सन्तोषप्रसाद गणेशले आफूहरू परिवार भित्रकै सदस्य भएको बताए ।
प्रदेशसभा सदस्य सुनिता गच्छदारले आफ्ना देवारलाई स्वकीयमा नियुक्त गरेकी छिन् । गच्छदारका देवर जननीपतिनाथ गच्छदार हुन् । गच्छदार उनका देवर हुन् । प्रदेश सभा सदस्य ललिताकुमारी चौधरीले दीपशिखालाई स्वकीय राखेकी छिन् । उनीहरू बिच फुपू भदैनीको सम्बन्ध छ उदयपुरकी सांसद लिला कुमारी राईले आफ्नै भदाहा भाइलाई स्वकीय बनाएकी छिन् ।
प्रदेशसभा सदस्यले स्वकीय नियुक्तको व्यवस्था प्रदेश सभाका पदाधिकार तथा सदस्यको पारिश्रमिक र सुबिधा सम्बन्धी ऐन २०७५ ले प्रत्येक प्रदेश सभा सदस्यले एक जना नायव सुब्बा सरहको एक जना स्वकीय सचिव राख्न पाउने व्यवस्था गरेको छ ।
कोशी प्रदेश सभा सचिवालयका सचिव गोपालप्रसाद पराजुलीले ‘योग्यता पुगेको व्यक्तिलाई प्रदेश सभा सदस्य स्वयम्ले नियुक्ति गरी प्रदेश सभा सचिवालयलाई जानकारी गराउने व्यवस्था रहेको बताए ।
उनले भने, सो को आधारमा नियुक्त भएको व्यक्तिको बैङ्क खातामा मासिक रूपमा प्रदेश सभा सचिवालयले पारिश्रमिक पठाउने गर्छ ।’यो समाचार नेपाल प्रेस बाट ।
