विराटनगर / झुठा विवरण पेस गरेर नेपाली नागरिकताको प्रमाणपत्र लिन सफल भएका एक जना भारतीय नागरिक विराटनगरबाट पक्राउ परेका छन् । भारतको अररिया जिल्लास्थित नरपतगञ्जका बासिन्दा अनिरुद्ध शर्मा पक्राउ परेका हुन् । मोरङ प्रहरीको विशेष टोलीले सोमबार राति १० बजेतिर विराटनगर महानगरपालिका–५ चाँदनी चोकबाट पक्राउ गरेको हो । आफू नेपाली नागरिक भएको गलत विवरण पेस गरेर नागरिकता लिन सफल भएका शर्मालाई कारबाहीका लागि मंगलबार सुनसरी प्रहरीको जिम्मा लगाएको मोरङ प्रहरी प्रमुख एसपी सन्तोष खड्काले बताए ।
पक्राउका क्रममा शर्मा र उनका परिवारका सदस्यले प्रहरीमाथि दुरव्यवहारसमेत गरेका थिए । जिल्ला प्रशासन कार्यालयले खटाएको नागरिकता वितरण टोलीमार्फत सुनसरीको दुहवी–६ बाट २०६३ साल माघ ७ गते नेपाली नागरिकता लिन शर्मा सफल भएको देखिएको छ । त्यसपछि उनी परिवारसहित विराटनगर महानगरपालिका–५ चाँदनी चोकमा आएर बस्न थालेको स्थानीयले बताए ।
गत फेब्रुअरी १५ मा भारतको निर्वाचन आयोगले सार्वजनिक गरेको भारतीय मतदाता नामावलीमा उनको नाम समावेश छ । जन्ममिति सन् १९६२ जनवरी १ राखेर उनले एसपीजे ०२३९३३५ नम्बरको भारतीय मतदाता परिचयपत्र प्राप्त गरेका छन् । कवाडीको काम गर्ने नाममा शर्मा भारतबाट २०५० सालमा नेपाल छिरेर सुनसरीको दुहवीमा बस्न थालेका हुन् । २०५५ सालमा दुहवीकै महिलासँग बिहे गरेका उनले जन्मसिद्धका आधारमा ०३३००९÷३२५ नम्बरको नेपाली नागरिकता लिन सफल भएको तथ्य फेला परेको छ ।
नेपाली नागरिकतामा उनको जन्म मिति २०२७ भदौ ११ गते उल्लेख छ । भारतीय मतदाता परिचयपत्रका आधारमा उनको उमेर ५९ वर्ष भए पनि नेपाली नागरिकताका आधारमा भने उमेर ५१ वर्ष मात्रै हुन्छ । भारतमा बुवा मुन्नर शर्माको नामबाट नागरिकता लिएका उनको नेपालमा बुवाको नाम मुनरलाल शर्मा उल्लेख छ । आफ्नो नाम पनि भारतमा अनिरुद्ध शर्मा र नेपालमा अनिरुद्र शर्मा भनेर लेखाएको पुष्टि भएको छ ।
उनले प्राप्त गरेको नागरिकता दिने सरकारी अधिकारीमा सुनसरीबाट खटिएको नागरिकता वितरण टोलीका प्रमुख पुन्यराज भट्टराईको नाम छ । नेपाली नागरिक हुन चाहने विदेशी नागरिकले त्यसअघि नै आफ्नो मुलुकको नागरिकता त्याग्नु पर्ने नियम छ । ‘नेपाली नागरिकता लिएका अनिरुद्धले भारतीय नागरिकता त्यागेका छैनन्,’ स्रोतले भन्यो, ‘उल्टै नेपाली नागरिकको जग्गा हडप्न मुद्दामामिला र अनेक प्रपञ्च गरिरहेका छन् ।’
प्रहरीले शर्मालाई पक्राउ गर्न गत आइतबार जिल्ला अदालत सुनसरीबाट अनुमति लिएको थियो । त्यसपछि सुनसरी प्रहरीको आग्रहमा उनलाई मोरङ प्रहरीले नियन्त्रणमा लिएको हो । यसअघि नै शर्माविरुद्ध सुनसरीस्थित जिल्ला प्रशासन र प्रहरी कार्यालयमा उजुरी परेको थियो । आफूविरुद्ध कारबाही हुने थाहा पाएपछि उनी फरार बनेका थिए ।
प्रहरीले विराटनगर आएको मौका छोपेर शर्मालाई नियन्त्रणमा लिँदै नेपालको प्रचलित कानुनअनुसार कारबाहीको दायरामा ल्याएको हो । प्रहरी स्रोतका अनुसार पक्राउ परेका भारतीयलाई छुटाउनका लागि कानुन व्यवसायीदेखि लिएर राजनीतिक दलका नेता र समाजसेवीका नाममा समेत दबाब आउन थालेको छ ।
सुनसरीका प्रमुख जिल्ला अधिकारी उमेश ढकालले शर्माको नाममा रहेको नेपाली नागरिकता बदरका लागि गृह मन्त्रालयमा सिफारिस गरिएको बताए । उनका अनुसार थप कारबाही अघि बढाउन प्रशासनबाट पनि अनुसन्धान भइरहेको छ ।
सुनसरी प्रहरी प्रमुख एसपी कमल थापाले नागरिकता ऐनअन्तर्गत कारबाही अघि बढाउन अदालतबाट मंगलबार नै म्याद थप गरेर पक्राउ परेका शर्मालाई हिरासतमा राख्दै बाँकी अनुसन्धान अघि बढाइएको जानकारी दिए । उनका अनुसार भारतीय नागरिक शर्मालाई नेपाली नागरिकता बनाइदिन भूमिका खेल्ने सबैलाई कारबाहीको दायरामा ल्याइने छ । नागरिकता दिने सरकारी कर्मचारी, नागरिकताका लागि सनाखत गर्ने तथा भूमिका खेल्ने सबै कारबाहीको दायरामा आउने एसपी थापाले बताए । उनले शर्माको परिवारमा अन्यले पनि नेपाली नागरिकता लिएको हुनसक्ने भएकाले अनुसन्धानको दायरा फराकिलो पारिएको जनाए ।
नेपालीको जग्गा आफ्नो नाममा पार्ने यस्तो थियो शर्माको खेल
नेपाली नागरिकता लिएको कस्ूरमा पक्राउ परेका भारतीय नागरिक शर्माले विराटनगर–५ मा एउटा परिवारको जग्गा हडप्ने प्रयास गरेको फेला परेको छ । उत्तमकुमार रायकी श्रीमती सीतादेवी रायको नाममा रहेको एक कट्ठा आठ धुर जग्गा कब्जा गरेर आफ्नो नाममा पार्न नक्कली कागजात पेस गरेर लिएको नेपाली नागरिकताकै आडमा अदालतमा मुद्दामामिला गरिरहेको पुष्टि भएको छ ।
किर्ते नेपाली नागरिकताको आडमा नेपालकै अदालतमा नेपालीको जग्गा हडप्ने खेलमा उनी सक्रिय रहेका हुन् । उत्तमकुमारले कित्ता नम्बर २९३८ नम्बरको एक कट्ठा आठ धुर जग्गा प्रमीलादेवी साहसँग २०६५ सालमा खरिद गरेर श्रीमती सीतादेवीको नाममा राखेका थिए ।
रायले शर्मालाई २०६६ सालमा आफ्नो जग्गामा बस्न दिएका हुन् । तर खाली गर्न नमानिकन जग्गा आफ्नो भएको दाबीसहित वडा कार्यालयमा शर्माले निवेदन दिएका थिए । वडामा भएको छलफलमा जग्गा आफ्नो नाममा रहेको कुनै आधार र प्रमाण पु¥याउन नसकेपछि २०७६ साल चैत मसान्तसम्ममा खाली गरिदिने सहमति उनले गरेका थिए । तर उत्तमकुमारले भने आफ्नी श्रीमतीको नाममा जग्गा कायम रहेको प्रमाणसहित जग्गाधनी प्रमाण पूर्जा, वडामा भएको सहमति तथा सम्पत्ति कर चुक्ता रसिद पनि बुझाए ।
विराटनगर महानगरपालिकाको न्यायिक समितिले जग्गा सीतादेवीकै भएको ठहर २०७७ साउन ५ गते गरिदियो । महानगरको न्यायिक समिति संयोजकमा उपमेयर इन्दिरा कार्की र सदस्यहरुमा वडाध्यक्ष विनोदकुमार बस्नेत तथा तीर्थेन्द्र न्यौपाने छन् । तर शर्माले जग्गा आफ्नो भएको दाबी गर्दै जिल्ला अदालत मोरङमा उत्तमकुमारलाई प्रतिवादी बनाएर २०७७ असोज २ गते रिट दायर गरे ।
न्यायाधीश मेदिनीप्रसाद पौडेलको इजलासले गत पुस २० गते स्थानीय न्यायिक समितिको निर्णय कानुन बमोजिम नै रहेको र त्यो नै सदर हुने फैसला गरिदियो । ‘मुलुकी देवानी कार्यविधि संहिता २०७४ को दफा १९७ बमोजिम फैसला गरिएको छ । न्यायिक समितिले गरेको फैसला मिलेकै देखिँदा सदर हुने ठहरी फैसला भएकाले केही गरिरहनु परेन,’ अदालतको फैसलामा भनिएको छ ।
अर्काको जग्गा छाड्न नमानिकन भारतीय नागरिक शर्माले नेपालीको जग्गामा आफ्नो हकदाबी गरेर जिल्ला अदालतको फैसलाविरुद्ध उच्च अदालत विराटनगरमा पुनरावेदन निवेदन दिए । मुद्दा अहिले उच्चमा विचाराधिन छ । मुद्दामामिलामा जाँदा भारतीय नागरिक रहेका अनिरुद्धले किर्ते गरेर बनाएको नेपाली नागरिकताको प्रमाणपत्र अदालतमा पेस गरेका छन् । नातामा शर्माका ज्वाई पर्ने राजेन्द्र ठाकुरले पनि जग्गा उत्तमकुमारकै भएको बताउँदै अरुले दाबी गर्न नमिल्ने उल्लेख गरे ।
भारतीले लिएको नेपाली नागरिकता स्वत बदर हुने कानुनी व्यवस्था रहेको सुनसरीका सहायक प्रमुख जिल्ला अधिकारी महेशकुमार पोखरेल बताए । उनका अनुसार नेपालमा रहेको सबै चलअचल सम्पत्ति जफत गरेर सरकारीकरण गरिने छ । विदेशी नागरिकलाई झुठा विवरणको आधारमा नागरिकता दिलाउन सनाखत वा सिफारिस गर्नेलाई छ महिनादेखि तीन वर्षसम्म कैद वा २५ देखि ५० हजार रुपैयाँसम्म जरिवाना अर्थात दुवै सजाय हुने कानुनी व्यवस्था छ । नागरिकता लिनेलाई भने एक वर्षदेखि पाँच वर्षसम्म कैद वा ५० हजारदेखि एक लाख रुपैयाँसम्म जरिवाना अर्थात दुवै सजाय हुने कानुनी प्रावधान छ । कोशि अनलाई बाट