विराटनगर । प्रमुख प्रतिपक्षी दल नेपाली कांग्रेसले १५ दिन भित्र भेन्टिलेटर र पर्याप्त आईसियू सुविधासहित १ हजार शैयाको कोभिड अस्पताल तयार पार्न प्रदेश सरकारसँग माग गरेको छ ।
मङ्गलबार विराटनगरमा पत्रकार सम्मेलनको आयोजना गर्दै कांग्रेसले कोरोना संक्रमण तीव्र गतिले फैलिरहेको र नागरिकहरुले न्यूनतम उपचार सेवासमेत नपाईरहेको बिषय औंल्याउँदै अस्पतालको प्रबन्ध गर्न प्रदेश सरकारसँग माग गरेको हो ।
नागरिकले उपचार नपाएर घर वा डेरामै छटपटाएर ज्यान गुमाईरहँदा पनि प्रदेश सरकारमा मानवीय संवेदना नदेखिएको कांग्रेसको आरोप छ । कोरोना महामारीका बेला उदासिन बनेको प्रदेश सरकारले दलको सुझाव नसुनेपछि पत्रकार सम्मेलनको आयोजना गर्नुपरेको प्रतिपक्षी दल नेपाली कांग्रेसले जनाएको छ ।
नेपाली कांग्रेस संसदीय दलका नेता राजीव कोइरालाले कोरोना महामारीका बेला सरकार र राज्यका निकायहरु निरीह बनिरहँदा जनताले अनाहकमा ज्यान गुमाइरहेको आरोप लगाउनुभयो ।
प्रदेश १ सरकार चैत्र महिनामा केही जवाफदेही देखिएपनि त्यसपछि एक्लै हिडँन थालेको र अहिले पनि सरकारले प्रतिपक्षसँग कुनै छलफल नगर्ने, सुझावप्रति ध्यान नदिने क्रियाकलाप गर्दै आएको उहाँको भनाई छ ।
उहाँले मन्त्रीहरुले फोन नउठाउने, मन्त्रालयका जिम्मेवार कर्मचारीले बिषयलाई गम्भीरतापूर्वक नलिने जस्ता समस्याले समेत थप जटिलता थपेको भन्दै त्यसलाई सच्याउन माग गर्नुभयो ।
संकटको समयमा जनसरोकारको बिषयमा छलफल गर्न नपाएको भन्दै नेता कोइरालाले संसदको बिशेष अधिवेशन बोलाउने सम्बन्धमा पनि छलफल भइरहेको जानकारी दिनुभयो
पत्रकार सम्मेलनमा बोल्नुहुँदै नेपाली कांग्रेसका प्रमुख सचेतक केदार कार्कीले धरानस्थित बिपी कोइराला स्वास्थ्य विज्ञान प्रतिष्ठानको कोभिड अस्पतालमा प्रयोग भएका ८ मध्ये ५ विराटनगरस्थित कोभिड(१९ उपचार केन्द्रमा प्रयोग भएका ५ मध्ये २ भेन्टिलेटर बिग्रिएको अवस्थामा रहेको स्पष्ट पार्नुभयो ।
निजी अस्पतालहरुसँग पनि भेन्टिलेटर र आईसियु पर्याप्त नरहेको भन्दै कार्कीले समन्वय र सहकार्य गरेर नागरिकको उपचार प्रक्रिया सहज बनाउन प्रदेश सरकारको ध्यानाकर्षण गराउनुभयो । यस्तै कांग्रेसले, प्रदेश नं।
१ का मुख्यमन्त्री शेरधन राईले साउन अन्तिम हप्तासम्म १ हजार शैयाको आईशोलेसन बनाउने भनी गरेको घोषणा समेत बोलीमै सिमित भएको आरोप समेत लगाएको छ ।
यस्तै पछिल्लो समय सरकारले जारी गरेको स्वास्थ्य सम्बन्धी प्रोटोकल सरकारबाटै उल्लङ्घन हुनु लज्जास्पद भएको नेपाली कांग्रेसको विश्लेषण छ ।
