इटहरी/ ट्रान्समिटरको कारणले सुनसरीको इटहरीस्थित पूर्वी गैसारको शिवालय मार्गका टोलबासीहरुले सास्ती व्यहोर्नु परेको छ ।
इटहरी उपमहानगरपालिका वडा नं. ८ स्थित शिवालय मार्गमा राखिएको विद्यूत ट्रन्समिटरको क्षमता कम भएका कारण दैनिक पटक पटक बत्ति जाँदा टोलबासीले सास्ती व्यहोर्नु परेको हो।
यसरी सास्ती भोगेको वर्षौ भईसक्दा पनि प्राधिकरणले वास्ता नगरेर सुतिरहेको स्थानीयको गुनासो छ। केही वर्ष अगाडि हचुवाको भरमा अलिकति क्षमता थपियो तर उक्त ट्रान्समिटरको क्षमताका प्राविधिक र व्यवहारिक पक्षलाई कुनै वास्ता नगरिएका कारणले समस्या जस्ताको तस्तै रहेको स्थानीयहरु बताउँछन् ।
उक्त ट्रान्समिटरले कति घरपरिवार धोनको छ ? कलकारखाना, उद्योग व्यवसाय कति चलेका छन ? कति भवनमा एसीजडित छन् ? त्यो अनुसार ट्रान्समिसनको क्षमता पुग्छ वा पुग्दैन भन्ने सामान्य हेक्का समेत नराख्दा आज यहाँका बासिन्दाले दैनिक दुःख झेलिरहनु परेको गुनासो स्थानीयको छ । विशेष गरेर गर्मीयाममा अत्याधिक खपत हुने समयमा त्यसको क्षमताले नभ्याएर ट्रान्समिटर बढी तातेपछि फ्याकिँदिने र गाउँ अन्धकारमय हुने अवस्थालाई विद्युत प्राधिकरणले खेलाचीको रुपमा लिएको छ ।
दैनिक कर्मचारी आएर बनाइरहनु पर्ने स्थानमा के भएको हो एक पटक हेर्ने फुर्सद प्राधिकरणका हाकीमलाई छैन । घुम्ने कुर्सीमा एसीको चिसो खाएर बसेर तलब र भत्ता (अरु के के त छँदैछ) खान पाए पुग्ने यस्ता कार्यालय प्रमुखको अब काम सकिएको अनुभूति भईरहेको एक स्थानीयको आक्रोस छ ।
त्यसको असर वा अन्य कारणले हाम्रो टोल विकास संस्थाको ३ नम्बर गेटमा भएको विद्युतको पोलबाट बेला बेला पड्केर आगो फ्याकेको स्थानीय व्यवसायीले बताए ।
उक्त पोलबाट आगो कसरी निस्कियो वा के पड्कीयो भन्ने हेक्का कसैलाई छैन । केही दिन देखि बेला बेला त्यहाँ पड्किएको तर प्राधिकरण चेक गर्न नआएको उनीहरु
बताउँछन् । पोलकै नजिकमा घरहरु भएका कारणले पनि उनीहरु त्रसित बनिरहेको अवस्था छ ।
यो समस्याको समधानका लागि प्राधिकरणको प्राविधिक टोली खटाएर आवश्यक कार्य तुरुन्तै नगरे कुनै दुर्घटना हुने सम्भावना नकार्न सकिन्न ।
