विराटनगर । प्रधानमन्त्री केपी शर्मा ओलीले कालापानी, लिपुलेक र लिम्पियाधुरा नेपालकै भूमि रहेको स्पष्ट सन्देश भारतलाई छाडेका छन् ।
भारतले आफ्नो दाबी गरिरहेका यी भूमि नेपालकै भएको सन्देश उनले दिएका हुन् । नेपाली भूमिमा भारतले कुनै पनि हालतमा दाबी गर्ननसक्ने उनको तर्क छ । भारतीय टेलिभिजन च्यानल जीन्यूजलाई सोमबार दिएको अन्तरवार्तामा प्रधानमन्त्री ओलीले नेपालले आफ्नै भूमि समेटेर नयाँ नक्सा बनाएको र यसबारे वार्ताबाट समस्या समाधान गर्न आफूहरु तयार रहेको पनि स्पष्ट पारे ।
प्रधानमन्त्री ओलीकै पहल र सक्रियतामा कालापानी, लिपुलेक र लिम्पियाधुरालाई समेटेर नेपालको नयाँ नक्सा जारी भएपछि भारतसँग नेपालको सम्बन्ध चिसिएको थियो । नक्सा जारी भइसकेपछि पनि नेपालले आफ्नो भूभाग फिर्ता ल्याउन नसकेको भनेर आलोचना भइरहेका बेला प्रधानमन्त्रीले भारतीय टेलिभिजन च्यानललाई अन्तरवार्ता दिँदै यी भूमिमा भारतले दाबी गर्न नमिल्ने बताएका हुन् ।
नेपालमा नयाँ संविधान जारी भएपछि भारतले लगाएको नाका बन्दीको पनि खुलेर सामना गर्न ओलीले नेपाली जनतालाई आह्वान गरेका थिए । त्यतिबेला ओलीको कदमको नेपालभर प्रशंसा भएको थियो । उनकै प्रशंसनीय कदमपछि नेपालले आफू भारतसँग मात्रै आश्रित छैन भन्ने सन्देश पनि छाड्न सफल भएको थियो । पछिल्लो समय उनी नै प्रधानमन्त्री भएका बेला नेपालले नयाँ नक्सा जारी गरेपछि भारत असन्तुष्ट बनेको थियो ।
प्रधानमन्त्री ओलीले भूगोल र जनसंख्याको आधारमा नेपालभन्दा भारत ठूलो भए पनि दुवै देशको सार्वभौमिकता बराबर रहेको प्रष्ट पारे । उनले दुवै देश सार्वभौम रहेको र दुई सार्वभौम देशका प्रधानमन्त्रीको हैसियतमा सानो र ठूलो देशको नभएर समान हैसियतको भएको स्पष्ट पारे ।
प्रधानमन्त्री ओलीले नेपालले भारत र चीनलाई फरक ढङ्गले व्यवहार नगर्ने पनि बताए । दुवै देशलाई पञ्चशीलको सिद्धान्तका आधारमा असंलग्न नीति अङ्गीकार गरिरहेको प्रधानमन्त्रीको भनाइ थियो । उनले भारत र चीनबीचको विवादित क्षेत्र गलवानका बारेमा नेपाललाई कुनै लेनादेना नभएको बताए ।
दुई देशबीचको विवादमा नेपाललाई कसैको पक्ष या विपक्षमा लाग्नु जरुरी नभएको प्रधानमन्त्रीले बताए । प्रधानमन्त्री ओलीले भारत र चीनबीचको सीमा विवाद समाधानका लागि आफूले मध्यस्थता गर्न सक्ने दाबी पनि प्रस्तुत गरेका छन् ।
भारत र चीनबीच समस्यारहित सम्बन्ध होस् भन्ने नै नेपालको चाहना रहेको प्रधानमन्त्रीले प्रष्ट पारे । अन्तर्वार्तामा प्रधानमन्त्री ओलीले वैशाखमा नेपालमा चुनाव हुने र त्यसपछि पनि आफू नै सत्तामा आउने दाबी गरेका छन् । प्रतिनिधिसभा विघटन गरेपछि ओलोचित बनेका ओलीले निर्वाचनमा आफ्नो पार्टीले अत्याधिक बहुमत ल्याउने दाबी गरे ।
