विराटनगर । कोरोना संक्रमितको उपचारमा निजी अस्पतालले मनपरी शुल्क असुल गरेको भन्दै त्यसको सर्वत्र विरोध सुरु भएको छ ।
सरकारले संक्रमितको निःशुल्क उपचार नगर्ने घोषणा गरेसँगै विराटनगरका निजी अस्पतालले उपचारको नाममा ब्रम्हलुट मच्चाएपछि त्यसको विरोध सुरु गरिएको हो ।
निजी अस्पतालले प्रदेश सरकारले सञ्चालन गरेको प्रदेश प्रयोगशालाले गर्दै आएको निःशुल्क स्वाब परीक्षण समेत रोक्नुपर्ने माग गर्दै आएका छन् । निजीले मनपरी शुल्क असुलेर परीक्षण गर्न नपाएपछि सरकारले नागरिकलाई दिदैं आएको सुविधा समेत कटौती गर्नुपर्ने माग निजी अस्पतालहरुले राखेका छन् ।
निजी अस्पतालको मनपरी विरुद्ध नेपाली काँग्रेस महानगर कार्यसमिति विराटनगरले बिहीबार पत्रकार सम्मेलन नै गरेर तत्काल मनोमानी रोक्न माग गरेको छ ।
स्वास्थ्य तथा जनसंख्या मन्त्रालयसँगको सहकार्यमा कोरोना संक्रमितको निःशुल्क उपचार गर्दै आएका विराटनगरका निजी अस्पतालले संक्रमितको उपचारमा दैनिक ५० हजार रुपैयाँसम्म शुल्क तोकेका छन् ।
यसरी मनपरी शुल्क तोक्नेमा विराटनगरको विराट मेडिकल कलेज पहिलो नम्बरमा छ । नोबेल मेडिकल कलेज र न्युरो अस्पतालले संक्रमितको निःशुल्क उपचार गर्दै आएका थिए । उनीहरुले पनि अहिले विरामी राखेर नागरिक लुट्ने गरेको काँग्रेस महानगर समितिको आरोप छ ।
स्वास्थ्य मन्त्रालयले सामान्य लक्षण देखिएका संक्रमितले निजी अस्पतालमा उपचार गर्दा ३ हजार ५००, जटिल अवस्थाको विरामीको उपचार गर्दा ७ हजार र गम्भीर अवस्थाका विरामीको उपचारमा दैनिक १५ हजार शुल्क तोकेको छ । यो खानासहितको जम्मा शुल्क हो ।
यसअघि विरामीको निःशुल्क उपचार गर्नेगरि सम्झौता गरेका अस्पताललाई सरकारले सोही आधारमा भुक्तानी गर्ने सम्झौता गरेको छ । यद्यपी निःशुल्क उपचारको लागि भर्ना भएका अस्पतालले विरामीसँग पनि अतिरिक्त शुल्क लिँदै आएका थिए
सरकारले संक्रमित बिरामीको उपचार खर्च नबेहोर्ने निर्णय गरेपछि भने ती अस्पतालले दैनिक ५० हजारसम्म शुल्क तोकेको भन्दै काँग्रेसले तत्काल घटाउनुपर्ने माग राज्यसँग गरेको नेपाली काँग्रेस विराटनगरका कार्यवाहक सभापति अरुण न्यौपानेले बताउनुभयो । संक्रमितको उपचारको लागि आएमा धरौटी वापत नै १ लाख देखि ४ लाख रुपैयाँसम्म माग्न थालेको भन्दै काँग्रेस महानगरले तत्काल यस्तो मनोमानी रोक्न माग गरेका हुन् ।
संक्रमितको उपचारको लागि सरकारले यसअघि तोकेको भन्दा ३ गुणा बढि शुल्क निजी अस्पतालले तोकेका छन् । अब सामान्य लक्षण भएका संक्रमितले आइसोलेसनमा भर्ना भएर उपचार गर्दा दैनिक ५ हजारदेखि ८ हजार रुपैयाँ शुल्क तिर्नुपर्ने भएको छ ।
यसअघि निःशुल्क उपचार प्राप्त गर्दै आएका सामान्य लक्षण भएका संक्रमितले पनि अब निजी अस्पतालमा १५ दिन बस्नु परेमा १ लाख २० हजार रुपैयाँ बुझाउनुपर्ने अवस्था छ ।
