विराटनगर, १६ भदौं : नेपाल भारत सीमा नाका पाँच महिनादेखि बन्द छ । कोरोना संक्रमणको जोखिम बढेपछि संघीय सरकारले गत चैत ११ गतेदेखि नेपाल–भारतबीचको सीमा नाका बन्द गरेको छ भने चैत १२ गतेदेखि साउन ६ गतेसम्म देशभर लकडाउन गरियो ।
साउन २० गतेबाट विराटनगर महानगरपालिकाले लकडाउन गर्नुका साथै पछिल्लो समयमा आएर स्थानीय प्रशासनले निषेध आज्ञा जारी गरेको छ । र पनि कोरोना संक्रमण घट्न सकेको छैन ।
जानकारहरू भन्छन्, भारतबाट लुकिछिपी मानिस प्रवेश गर्ने क्रम नरोकिएकाले संक्रमणको जोखिम बढेको हो । विभिन्न ठाउँबाट मानिस नेपाल प्रवेश गर्न नरोकिएपछि सीमा क्षेत्रका बस्तीहरूमा कोरोना संक्रमण बढेको हो ।
मोरङको झण्डै ६४ किलोमिटर दुरी भारतसँग जोडिएको छ । अवैध आगमनलाई रोक्न सरकारले लकडाउनपछि सुरक्षा सतर्कता बढाएको छ ।
सुरूमा मोरङको दक्षिणी सीमामा सशस्त्र प्रहरीको मात्र ७१ वटा बोर्डर आउट पोष्ट स्थापना गरिएको थियो ।
बर्खा सुरू भएपछि सशस्त्र प्रहरीका जवानहरूलाई सीमामा खान, बस्न समस्या भएपछि पोष्टहरू घटाइएको छ ।
स्थानीय मानिसको निजी जग्गामा अस्थायी पोष्ट बनाएकाले बर्खामा खेती गर्नुपर्ने भएपछि निजी जग्गाका पोष्टहरू पनि हटाएको सशस्त्र प्रहरीले जनाएको छ । अहिले मोरङमा सशस्त्र प्रहरीका २५ वटा मात्र बोर्डर आउट पोष्टहरू छन् ।
त्यसैगरी नेपाल प्रहरीका स्थायी तथा अस्थायी गरी ३१ वटा इप्रका तथा चौकीहरू सीमामा छन् । त्यहाँ ३ सय ५० भन्दा बढी प्रहरी कार्यरत रहेको मोरङका प्रहरी प्रमुख प्रहरी उपरीक्षक सन्तोष खड्काले बताए ।
सशस्त्र र नेपाल प्रहरीका गरी यति धेरै सुरक्षाकर्मीहरू सीमामा कार्यरत रह“दा पनि भारतबाट अवैध रूपमा मानिसहरू नेपाल छिर्ने क्रम भने रोकिएको छैन । कतै सुरक्षाकर्मीको आँखा छलेर, कतै पैसा दिएर वा आपसी मिलेमतोमा मानिसहरू नेपाल छिर्न छाडेका छैनन् ।
विराटनगर भन्सार नाका भएर पनि दैनिक ६ सयदेखि ७ सय मानिस भारतबाट आउने गरेका छन् । मालवाहक गाडीका चालक र सह चालकहरू निर्वाध रूपमा नेपाल छिर्ने गरेका हुन् ।
नेपाल प्रवेश गर्दा थर्मल गनले उनीहरूको तापक्रम जाँच गर्नेबाहेक अरू केही गरिदैन । तिनीहरू नेपाल प्रवेश गरेपछि कहाँ जान्छन् ? कहाँ बस्छन् ? त्यसको सोधी खोजी छैन ।
मुलुक लकडाउनमा गैसकेपछि रानी भन्सार नाका भएर ५ हजार ७ सय ६४ जना नेपालीहरू नेपाल प्रवेश गरेका छन् । त्यसैगरी १२ हजार २ सय ९७ जना भारतीयहरू जोगबनी नाका भएर स्वदेश फर्किएका छन् । यो तथ्यांक भदौ १४ गतेसम्मको हो ।
यसरी सरकारी लगतबाट जति मानिस नेपाल आए र भारत गए त्योभन्दा बढी मानिसहरू अवैध तरिकाले आवत–जावत गरेको अनुमान छ ।
भारतीय व्यापारीहरू जोगबनीको टिकुलिया बस्ती भएर नेपाल प्रवेश गरेर विराटनगर, इटहरी र धरानसम्म पुगेर आफ्नो व्यापारिक कारोबारको भुक्तानी लिने गरेका छन् ।
यो काममा नेपाल प्रहरी र सशस्त्र प्रहरीको सहयोग रहँदै आएको छ भने नेपाल डुलाउने काममा मनमौजी पैसा लिएर यहाँका ट्याक्सी चालकहरूले सहयोग पुर्याउँदै आएका छन् ।
सो कुरालाई पुष्टि गर्दै एक ट्याक्सी चालकले भने भारतीय व्यापारीलाई धरानसम्म पुर्याएर ल्याएको हामी १७ हजारसम्म लिने गर्छाै ।
विराटनगर महानगरपालिकाले पनि लकडाउन गरे पनि अवैध आवत–जावतलाई भने रोक्न ध्यान दिएन ।
लकडाउनकै बीचमा आरती स्ट्रिप्समा काम गर्ने मजदुरहरू नेपाल आएर काम गरेकाले उनीहरूको माध्यमबाट कोरोना नेपाल भित्रिएको आशंका छ ।
सो उद्योगका मजदुर र स्टाफ गरी ६२ जनामा कोरोना संक्रमण भएको पाइयो । भारतीयहरू आधिकारिक रूपमा नेपाल आउन नपाउने भए पनि कम्पनीले मिलाएर मजदुर ल्याएकाले कोरोना पनि सँगै प्रवेश गर्यो ।
भारतीयहरू स्वदेश जाने र नेपालीहरू आउने मोरङको एक मात्र आधिकारिक नाका रानी हो । तर त्यहा“बाट मात्रै मानिसहरू यो बीचमा आवत–जावत गरेका छैनन् ।
अवैध रूपमा आउने मानिसलाई समाएर क्वारेन्टाइनमा जिम्मा लगाउने गरेको प्रहरी बताउँछ । तर जसलाई त्यसरी समाएर क्वारेन्टाइनमा जिम्मा नलगाई आपसी लेनदेनमा छोड्ने गरेकाले अवैध रूपमा भारतबाट मानिसहरू आउने क्रम बढेको हो ।
उदघोष दैनिकबाट साभार
