विराटनगर । कोरोना महामारीको कारण शुल्क समयमा बुझाउन नपाएका विराटनगर–४ स्थित नोबेल मेडिकल कलेज एण्ड टिचिङ्ग हस्पिटलका विद्यार्थीहरूसँग कलेजले चर्को जरिवाना असुली गर्न थालेको छ ।
नोबेलमा ‘डिम्पलोमा इन फार्मेशी’ अध्ययन गर्दै आएका विद्यार्थीहरूले समयमा शुल्क बुझाउन नसक्दा जरिवानाको नाममा मनपरी रकम असुल्न थालेको हो ।
अस्पतालले तोकेको जरिवना शुल्क विद्यार्थीले नबुझाए परीक्षबाट बञ्चित गराउने धम्की दिइरहेको गुनासो विद्यार्थीहरूले गरेका छन् । डिप्लोमा इन फार्मेसीको तीन वर्षको कोर्ष पुरा गरेको शुल्क नोबेलले ३ लाख ३७ हजार रुपैयाँ तोकेको छ ।
तोकिएको शुल्क समयमा नबुझाएको भन्दै जम्मा शुल्कको ३६ प्रतिशत थप जरिवाना दिनुपर्ने दबाब कलेज प्रशासनले विद्यार्थीहरुलाई दिएको हो । विद्यार्थीले समयमा शुल्क नबुझाएको भन्दै जरिवानाको नाममा चर्को रकम असुल गर्न थालिएको हो । कोरोना महामारीको बेला सरकारले विभिन्न कर र बैंकले ब्याज लिने समय बृद्धि गरेको बेला नोबेलले भने समयमा शुल्क बुझाउन नपाएका विद्यार्थीमाथि लुटको धन्दा चलाएको गुनासो अभिभावकहरुले गरेका छन् ।
नोबेलले बनाएको मापदण्ड अनुसार विद्यार्थी भर्ना हुँदा १ लाख २० हजार रुपैयाँ र ३÷३ महिनामा विद्यार्थीले २० हजार २ सय रुपैयाँ शुल्क बुझाउनुपर्छ । कोरोना संक्रमणको सन्त्रास सामान्य बन्दै गएपछि नोबेलमा परीक्षा फारम भर्न आएका डिप्लोमा इन फार्मेसीको चौथो वर्षमा अध्ययरत एक विद्यार्थीलाई १ लाख २० हजार १ सय ६० रुपैयाँ थप रकम मागेको छ । कोरोना संक्रमणका कारण अध्ययनदेखि परीक्षा प्रणालीमा समेत असर पुगेको बेला नोबेलले भने शुल्क बुझाउन बिलम्ब भएको दावी गर्दै विद्यार्थीसँग जर्बरजस्ती जरिवाना असुल्न थालेको पीडित विद्यार्थीले बताएका छन् ।
विद्यार्थीले समयमै शैक्षिक शुल्क वापतको किस्ता रकम नबुझाएको आरोपमा कारवाहीस्वरुप असुल्ने जरिवाना रकम भने वार्षिक शुल्क बराबर छ । कसलाई कति लिन सकिन्छ, त्यति लिनेगरि व्यक्तिपिच्छे दवाव सिर्जना गरिएको विद्यार्थीले बताएका छन् । दोस्रो र तेस्रो वर्षको ‘ब्याकपेपर’ को परीक्षा फारम भर्न आएका डिप्लोला इन फार्मेसी अध्ययरत विद्यार्थीसँग एकसाथ ठूलो रकम जरिवाना मागिएको हो ।
जरिवाना रकम नुबझाए परीक्षाबाट बञ्चित गराइदिने धम्की पनि दिँदै आएको ती विद्यार्थीले बताए । ‘जरिवाना लागेको विषय अस्पतालको लेटर प्याडमा लेखेर दिन आग्रह गर्दा भने प्रशासनले नमानेको विद्यार्थीको भनाइ छ । आउँदो मंसिर १४ गतेसम्म ब्याक लागेका विद्यार्थीले फारम भरिसक्नुपर्ने छ । १४ मंसिरसम्म फारम नभरेमा परीक्षाबाट बन्चित हुने अवस्था छ ।
प्रशासनले जरिवाना रकम नबुझाए परीक्षाबाट बञ्चित हुने धम्की दिएको कारण जरिवना तिर्न नसक्ने विद्यार्थीहरू मानसिक तनाबमा परेका छन् । नोबेल प्रशासनले यस अगाडि विद्यार्थीले बुझाएको शुल्कको रसिद भने दिएको छैन । बैंकमा जम्मा गरेर भौचरसमेत हरायो भन्दै रसिद नदिएको विद्यार्थीले बताएका छन् ।
फार्मेसीकै अर्का विद्यार्थीले कलेज प्रशासनले परीक्षाबाट बञ्चित गराउने धम्कीसहित जरिवानाको नाममा रकम बार्गेनिङ गरिरहेको बताए । फार्मेसीका विद्यार्थीसँग जस्तै नोबेलले ल्याब टेक्निसियन पढ्ने विद्यार्थीसँग पनि बार्गेनिङ गरेको गुनासो सार्वजनिक भएको छ । विराटनगका युवा योगराज आशिष दाहालले आफ्नो फेसबुक पेजमा नोबेलले जरिवाना वापत असुलेको रकमको बिलसहित सार्वजानिक गरेका छन् । विद्यार्थीले बुझाउनुपर्ने ३८ हजार भएपनि त्यसमा ६० हजार थपेर ९८ हजार बुझाउनु परेको दाहालको भनाइ छ ।
कलेज प्रशासनले तोकेको तिर्ने की पढाई छोडेर घर फिर्ने ? भनेर धम्की दिएको विद्यार्थीहरु बताउँछन् । नोबेल कलेजमा अध्ययनका लागि शुल्क बुझाईसकेका विद्यार्थीले पुनः अभिभावकसँग रकम मागेर बुझाउनुपर्दा पारिवारिक समस्या समेत भोग्नु परेको गुनासो गरेका छन् ।
नोबेल मेडिकल कलेजका प्रिन्सिपल डाक्टर रामहरी घिमिरेले भने मिडियासँग गुनासो गर्ने विद्यार्थीहरुलाई आफ्नो सम्पर्कमा पठाईदिन आग्रह गर्नुभयो । उहाँले सुरु भर्नाको समयमा विद्यार्थीसँग गरिएको सम्झौताका आधारमा जरिवाना लिएको दावी गर्नुभयो ।
