विराटनगर । कोशी प्रदेशका मुख्यमन्त्रीले काठमाडौँ आउजाउ गर्दा प्रदेशको ढुकुटीबाट करिब ३५ लाख रुपैयाँ हवाई भाडामै खर्च गरेका छन् ।
नियमितजसो काठमाडौं आउजाउ गर्दा मुख्यमन्त्रीहरूले ३४ लाख ९० हजार ९११ रुपैयाँको टिकट काटेका हुन् । कोशी प्रदेश मुख्यमन्त्री तथा मन्त्रिपरिषद्को कार्यालयका अनुसार यो खर्च आर्थिक वर्ष २०७८/७९ देखि २०८०/८१ सम्मको हो ।
हवाई टिकटमा धेरै खर्च गर्नेमा हिक्मतकुमार कार्की अगाडि छन् । पछिल्लो दुई वर्षमा तेस्रोपटक मुख्यमन्त्री बनेका कार्की र उनको सचिवालयका लागि प्लेन टिकटमा मात्रै १० लाख ९३ हजार ३३५ रुपैयाँ राज्यकोषबाट खर्च गरेको देखिन्छ ।
कार्की दोस्रो प्रदेश तथा प्रतिनिधिसभा निर्वाचनपछि २०७९ पुस २५ गते नेकपा माओवादी केन्द्रको समर्थनमा मुख्यमन्त्री बनेका थिए । त्यसपछि २०८० भदौ २२ गतेदेखि असोज २७ गतेसम्म संविधानको धारा १६८ को उपधारा ३ अनुसार ठूलो दलको नेताको रुपमा मुख्यमन्त्री बनेका थिए ।
२०८१ वैशाख २७ गते मुख्यमन्त्री केदार कार्की पदमुक्त भएपछि माओवादी केन्द्रको समर्थनमा हिक्मतकुमार कार्की मुख्यमन्त्री बनेका थिए । केन्द्रमा नयाँ समीकरण बनेपछि उनी अहिले नेपाली कांग्रेसको समर्थनमा मुख्यमन्त्री छन् ।
हिक्मतपछि धेरै खर्च गर्नेमा केदार कार्की छन् । ६ महिना प्रदेशको मुख्यमन्त्री बनेका कार्कीले मात्रै १० लाख ४८ हजार २६० रुपैयाँ हवाई टिकटमा खर्च गरेका छन् । केदार कार्की २०८० असोज २८ गतेदेखि २०८१ वैशाख २७ गतेसम्म कोशी प्रदेशको मुख्यमन्त्री बनेका थिए ।
केदार कार्की र हिक्मतकुमार कार्की आफ्नो कार्यकालमा मुद्दा मामिलाका लागि धेरै समय काठमाडौं आउजाउ गरे । नियमित आउजाउ गर्दाको प्लेन टिकट प्रदेश सरकारकै कोषबाट खर्च भएको मुख्यमन्त्री कार्यालय स्रोत बताउँछ ।
मुख्यमन्त्री तथा मन्त्रिपरिषद्को कार्यालयका अनुसार केदार कार्की र हिक्मतकुमार कार्कीले मात्रै गत असारसम्म प्लेन टिकटका लागि २१ लाख ४१ हजार रुपैयाँ खर्च गरेका छन् ।
आर्थिक वर्ष २०७८/७९ देखि २०८०/०८१ मा प्रदेशमा शेरधन राई, भीम आचार्य, राजेन्द्र राई, हिक्मतकुमार कार्की, उद्धव थापा र केदार कार्की मुख्यमन्त्री थिए । २०८० साउन १७ गतेदेखि एक महिना मुख्यमन्त्री बनेका उद्धव थापाले पनि प्लेन टिकटमा ८८ हजार ३० रुपैयाँ खर्च गरेका छन् ।
आर्थिक वर्ष २०७८/०७९ मा तत्कालीन मुख्यमन्त्री शेरधन राईले प्लेन टिकटमा मात्रै १ लाख ९५ हजार रुपैयाँ खर्च गरेका थिए । २०७४ फागुन २ गते मुख्यमन्त्री नियुक्त भएका राई २०७८ भदौ १० गतेसम्म मात्रै मुख्यमन्त्री भए । आर्थिक वर्ष ०७८/७९ को दुई महिनामा मात्रै उनी र उनको सचिवालयले प्लेन टिकटका लागि राज्यकोषको १ लाख ९५ हजार रुपैयाँ खर्च गरेको थियो ।
उनीपछि मुख्यमन्त्री बनेका भीमप्रसाद आचार्यले १ लाख ४५ हजार प्लेन टिकटका लागि मात्रै खर्च गरे । भीम आचार्य २०७८ भदौ १० गतेदेखि २०७८ कै कात्तिक १६ गतेसम्म मुख्यमन्त्री बनेका थिए ।
भीम आचार्यपछि मुख्यमन्त्री बनेका राजेन्द्र राई र उनको सचिवालयले प्लेन टिकटका लागि मात्रै राज्यकोषबाट ९ लाख १९ हजार ७५६ रुपैयाँ खर्च गरेको कार्यालयले जनाएको छ । राई २०७८ कात्तिक १६ गतेदेखि २०७९ पुस २५ गतेसम्म मुख्यमन्त्रीको जिम्मेवारीमा थिए । आर्थिक वर्ष २०७८/०७९ मा उनले प्लेन टिकटका लागि ३ लाख ४३ हजार ३७६ रुपैयाँ खर्च गरेका थिए । आर्थिक वर्ष २०७९/८० मा ५ लाख ७६ हजार ३८० रुपैयाँ खर्च गरेका थिए ।
पछिल्लो तीन वर्षको अवधिमा मुख्यमन्त्रीसहित मुख्यमन्त्रीको सचिवालयले भत्ता र प्लेन टिकटका लागि मात्रै जम्मा ५५ लाख ७९ हजार ५७५ रुपैयाँ खर्च गरेको मुख्यमन्त्री कार्यालयको खर्च विवरणमा उल्लेख छ ।
कार्यालयका अनुसार मुख्यमन्त्री र उनको सचिवालयको भत्तामा मात्रै २० लाख ८८ हजार ६६४ रुपैयाँ खर्च भएको छ ।
