मोरङको बूढीगङ्गा गाउँपालिका– ५ का निश्चल रायको हत्यामा संलग्नलाई पक्राउ गर्न माग गर्दै विद्यार्थीले प्रदर्शन गरेका छन्
१४ वर्षीय बालक राय गत कात्तिक २४ गते सिङ्घिया खोलामा शङ्कास्पद अवस्थामा फेला परेका थिए । एक महिनासम्म अनुसन्धान प्रतिवेदन सार्वजनिक नगरेपछि विद्यार्थीले प्रहरी चौकी निमुवाअगाडि प्रदर्शन गरेका हुन् । विद्यार्थीले बाँच्न पाउने अधिकार सुरक्षित गर, हत्या आरोपीलाई सार्वजनिक गर भन्दै प्रदर्शन गरे ।
रायको शङ्कास्पद मृत्यु प्रकरणको छानबिनका लागि प्रहरीले चासो नदेखाएको भन्दै स्थानीय र आफन्तले प्रदर्शन गरिरहेका छन् । आफन्तले निष्पक्ष छानबिनको माग गर्दै बिहीबार अर्थमन्त्री जनार्दन शर्मालाई ज्ञापनपत्र बुझाएका थिए ।
गत कात्तिक २२ गते दिउँसो घरनजिकैको लिची बगानमा खेल्न गएका १४ वर्षीय राय बेपत्ता भएका थिए । तीन दिनपछि सिङ्घिया खोला किनारमा शव भेटिएको थियो ।
हराएको तीन दिनपछि मृत भेटिएका बालकको शव पानीमा डुबेर मृत्यु भएजस्तो नदेखिने बुबा उपेन्द्रले बताए । उनका अनुसार घाँटी भाँचिएको, तिघ्रामा डोरीले बाँधेको जस्तो डाम र छातीमा जुत्ताले हानेको जस्तो डाम र पेटमा सियोले रोपिएको जस्ता प्वाल देखिएको छ ।
उपेन्द्र माओवादी केन्द्रका प्रदेश १ सदस्य तथा मजदुर सङ्गठनका नेता हुन् । राजनीतिक प्रतिशोध र पारिवारिक रिसिइबीका कारणले पनि आफ्नो छोराको हत्या भएको हुनसक्ने उनको गुनासो छ ।
मोरङका प्रहरी उपरीक्षक जनार्दन जिसीले बालक मृत्यु प्रकरणको अनुसन्धान भइरहेको बताए । प्रारम्भिक पोस्टमार्टम रिपोर्टमा सबै विषय स्पष्ट नभएको बताउँदै उनले भिसेरा रिपोर्ट आएपछि थप विषय खुल्ने बताए । 
