दुहबी / सुनसरीको दुहबीमा जारी एघारौं भलुवा अन्तर्राष्ट्रिय आमन्त्रण गोल्डकप फुटबल प्रतियोगिताको आज मंगलबार भएको तेस्रो क्वाटर फाइनल खेलमा चात्यासा फुटबल क्लब दमक झापाले रारा फुटबल क्लब राजारानी धनकुटालाइ २-१ गोल अन्तरले पराजित गर्दै सेमिफाइनलमा प्रवेश गरेको छ । निर्धारित ८० मिनेटको अत्यन्तै रोमाञ्चक एवं प्रतिस्पर्धात्मक भएको खेलको मध्यान्तर सम्म दुवैतर्फबाट गोल रहित बराबरी भएको थियो । मध्यान्तर पछिको खेलको ७ औं मिनेटमा चात्यासा फुटबल क्लब झापाका खेलाडी हरि कार्कीले १ गोल गर्दै आफ्नो टिमलाई १-० ले अग्रता दिलाएका थिए । खेलको १३ औं मिनेटमा चात्यासा फुटबल क्लब झापाका खेलाडी राजेश दाहालले १ गोल गर्दै आफ्नो आफ्नो टिमको बिजय सुनिश्चित गराए । खेलको ३२ औं मिनेटमा रारा फुटबल क्लब राजारानी धनकुटाका खेलाडी प्रदीप बुढाथोकीले १ गोल गरेका थिए। खेलको उत्कृष्ट खेलाडी चात्यासा फुटबल क्लब झापाका खेलाडी असिम राई घोषित भए । उनले नगद ५ हजार सहित मेडल प्राप्त गरे ।
भोलि बुधबारको अन्तिम क्वाटर फाइनल खेल बिदेशी खेलाडीले भरपुर जस्ट जोन एफ.सि. नाइजेरिया र रास्ट्रिय एवं स्थानीय खेलाडीले भरपुर एम.एफ.सि. सुनसरीकाबिच हुने आयोजकले जनाएको छ ।
बिहिवारको पहिलो सेमिफाइनल खेल चात्यासा फुटबल क्लब झापा र मेमोरी युवा क्लब दुहबी बिच हुनेछ ।
