विराटनगर / विराटनगरस्थित नोबेल शिक्षण अस्पताल आसपास सञ्चालनमा रहेका ७ वटा फार्मेसी (औषधि पसल)मा सिल गरिएको छ ।
बिरामी ठग्ने फार्मेसीमाथि प्रशासनले कारबाही सुरु गरेको छ औषधि पसलहरूले बिरामी र उनीहरूका आफन्तलाई ठगी गरिरहेको विषय सार्वजनिक भएपछि जिल्ला प्रशासन कार्यालय मोरङ र औषधि व्यवस्था विभाग विराटनगरको संयुक्त टोलीले सघन अनुगमन गर्दै ती फार्मेसीहरू सिलबन्दी गरेको हो ।
नोबेल अस्पताल अगाडि तथा आसपास सञ्चालित १४ वटा फार्मेसीमा शुक्रबार आकस्मिक रूपमा अनुगमन गरिएको थियो । त्यस क्रममा गम्भीर लापरबाही, कानुनविपरीत औषधि बिक्री र बिरामीको स्वास्थ्यमा प्रत्यक्ष असर पर्ने खालका अनियमितता भेटिएपछि ७ वटा फार्मेसीमा तत्काल ताला लगाइएको प्रशासनले जनाएको छ ।
सिलबन्दीमा पर्ने फार्मेसीहरूमा सीताराम, छिन्नमस्ता, धनगढी माई मेडिकल, सुसंस्कृति, गोल्ड, मित्र र आविष्कार रहेका छन् । औषधि व्यवस्था विभाग विराटनगरका सूचना अधिकारी दीपेन्द्र खड्काका अनुसार फार्मेसीहरूले बिना दर्ताका विदेशी औषधि बिक्री गर्ने, म्याद गुज्रिएका औषधि राख्ने तथा चिकित्सकको सिफारिसभन्दा बाहिरका औषधि बिरामीलाई जबर्जस्ती भिडाउनेजस्ता गम्भीर लापरबाही गरेका थिए ।
‘बिरामी ठगिएको गुनासो आएपछि हामीले यसलाई सामान्य रूपमा लिएनौँ,’ सूचना अधिकारी खड्काले भने, ‘अनुगमन गर्दा अधिकांश फार्मेसीले कानुनी मापदण्ड पालना नगरेको, मूल्यमा मनपरी गरेको र बिरामीको स्वास्थ्यलाई जोखिममा पार्ने काम गरेको पुष्टि भएपछि सिलबन्दी गर्नु परेको हो ।’ अनुगमनकै क्रममा मित्र फार्मेसीले बिरामीलाई आवश्यक नपर्ने औषधि समेत थमाइदिएको, चर्को मूल्य असुलेको र ठगी गरेको तथ्य खुलेको थियो ।
त्यसपछि सरकारी निकायले तत्काल ‘एक्सन’ लिँदा स्थानीय र बिरामीका आफन्तहरूले प्रशासनको कदमलाई सकारात्मक रूपमा लिएका छन् । विभागले सिलबन्दी गरिएका फार्मेसी सञ्चालकहरूमाथि औषधि ऐनअनुसार थप अनुसन्धान र कारबाही प्रक्रिया अघि बढाइने जनाएको छ ।
नोबेल शिक्षण अस्पतालजस्तो ठूलो उपचार केन्द्र वरिपरि बिरामीको कमजोरीको फाइदा उठाएर गरिएको ठगी नियन्त्रण गर्न अब नियमित अनुगमन र कडा निगरानी गरिने विभागले उल्लेख गरेको छ ।
