प्रहरीले मोरङको बेलबारीमा रहेको कोशी प्रदेश प्रहरी अस्पताल सुटुक्क इनरुवा सारेको छ । मोरङको बेलबारीमा रहेको अस्पताल सोमबार राति सुटुक्क सुनसरीको इनरुवा सारेको हो ।
गत वर्ष ११ फागुन २०७९ मा बेलबारीमा नेपाल प्रहरीका तत्कालिन प्रहरी महानिरीक्षक धिरजप्रताप सिंहले प्रादेशिक प्रहरी अस्पतालको सुभारम्भ गरेका थिए । एक वर्ष नपुग्दै बेलबारीबाट सारेको स्थानीयले गुनासो गरे ।
नेपाल प्रहरी कोशी प्रदेशका डिआइजी राजेशनाथ बास्तोलाले बेलबारीमा ठाउँ साघुँरो भएका कारण अस्पताललाई फराकिलो ठाउँ इनरुवा सारिएको बताए । प्रहरीले रातारात अस्पताल सारेको भन्दै बेलबारीका स्थानीयले असन्तुष्टि जनाइरहेका छन् । डिआइजी बास्तोलाले भने ३–४ दिन लगाएर अस्पताल स्थानान्तरण गरिएको दाबी गरे ।
बेलबारीमा रहेको इलाका प्रहरी कार्यालय नयाँ भवनमा सरेपछि पुरानो भवनमा अस्पताल सञ्चालन गरिएको थियो । तर साघुरो भवनमा अस्पतालका उपकरणहरु राख्ने ठाउँ नभएपछि बेलबारीबाट इनरुवा सारिएको बास्तोलाले जानकारी दिए । ‘बेलबारीमा ठाउँ सानो भएका कारण खुला र भौतिक संरचना भएको ठाउँ इनरुवामा सारिएको हो,’ उनले भने,‘कोशी प्रदेशमै छ बाहिर गएको छैन ।’
नगरपालिकाले समन्वय गर्दागर्दै प्रहरीले रातारात अस्पताल सारेको बेलबारी नगरपालिका प्रमुख दिलप्रसाद राईले गुनासो गरे ।
नेपाल प्रहरीले माग गरे अनुसार दुई बिघा जग्गा पालिकाले खोजिदिएको बताउँदै उनले प्रहरीले सार्ने विषयमा सल्लाह नगरेको दाबी गरे । ‘नगरको अस्पताल पनि बन्दैछ, त्यहीँ समन्वय गरेर चलाउन दिने सल्लाह पनि थियो, प्रहरीले मागेको दुई बिघा जग्गा दिन दाता पनि खोजेका थियौं,’ उनले भने,‘ म बुबाको काममा संखुवासभा आएको छु, आज बिहान मात्रै अस्पताल सारेको थाहा भयो ।’
