ट्रान्सपरेन्सी इन्टरनेशनल नेपालले प्रधानमन्त्री केपी शर्मा ओलीको संरक्षणमा भ्रष्टाचार मौलाएको आरोप लगाएको छ।
खुद्रे मुद्दाहरु बोकेर अख्तियारले भ्रष्टाचार नियन्त्रणको डंका पिटे पनि प्रधानमन्त्रीको संरक्षणमा ठूला भ्रष्टाचारका काण्डहरू घटेको ट्रान्सपरेन्सी इन्टरनेशनलको आरोप छ।
पछिल्लो समय अख्तियार दुरुपयोग अनुसन्धान आयोगले आयल निगमको जग्गा खरिद प्रकरणको फाइल तामेलीमा राखेपछि ट्रान्सपरेन्सी इन्टरनेसनलले यस्तो आरोप लगाएको हो।
न्यूज एजेन्सी नेपालसँग आज कुराकानी गर्दै ट्रान्सपरेन्सी इन्टरनेशनलका अध्यक्ष खेमराज रेग्मीले प्रधानमन्त्रीको ओठे प्रतिवद्धता र व्यवहारका कारण भ्रष्टाचारीहरु संरक्षित भएको बताए।
बालुवाटार जग्गा प्रकरण, सेक्युरिटी प्रिन्टिङ प्रेस खरिद प्रकरण, ओम्नी प्रकरणमा प्रधानमन्त्रीले दिएको अभिव्यक्तिले उहाँको संरक्षणमा भ्रष्टाचार मौलाएको पुष्टि हुने उनले बताए।
‘भ्रष्टाचारको मूल भनेको राजनीतिक नेतृत्व हो। खुद्रा, मसिनालाई रोकेर भ्रष्टाचार नियन्त्रण हुँदैन। प्रधानमन्त्रीले बेला बखत म भ्रष्टाचार गर्दिनँ र अरुलाई पनि गर्न दिन्नँ, शून्य सहनशीलता अपनाउँछु भन्नुभयो। तर व्यवहारमा उतार्न सक्नु भएन। उहाँको भ्रष्टाचारविरुद्धको बोली ओठे प्रतिवद्धतामै सीमित भयो। त्यसो होइन भने बालुवाटार जग्गा प्रकरणमा आफ्नै महासचिवलाई कुनै गल्ती गरेको छैन भनेर किन जोगाउनुभयो? सेक्युरिटी प्रिन्टिङ प्रकरणमा लेनदेनको अडियो सार्वजनिक हुँदा पनि मन्त्रीले कुनै गल्ती गरेको छैन भनेर किन ढाकछोप गर्नुभयो?’
रेग्मीले स्वास्थ्य सामग्री खरिदमा ठेक्का ओम्नी समूहलाई दिँदा अनियमितता भएको आरोप लगाए। ‘ओम्नीलाई पनि कानुन विपरीत एक मन्त्रीको सल्लाहकारले रातारात दिएको ठेक्का कानून विपरित छ। यसमा सुरुमै साँठगाँठ भएर कमिसन खाने नियतले ओम्नी समूहलाई ठेक्का दिएको देखिन्छ’, उनले भने, ‘त्यसमा आदेश दिने उपप्रधानमन्त्री, मन्त्रीको समेत कुनै संलग्नता छैन भनेर उहाँले कसरी भन्न सक्नुभयो? उहाँ (ओली) अख्तियार त होइन उहाँ न्यायाधीश त होइन।’
रेग्मीले प्रधानमन्त्रीको बोलाइ र गराइमा भिन्नता रहेको बताए। ‘प्रधानमन्त्रीको बोलाइ र गराइमा एकरुपता देखिएन। उहाँ नजिकका राजनीतिक र कर्मचारी तहमा भएका मानिसहरुले जति लुटे पनि हुन्छ’, रेग्मीले भने, ‘हामीले प्रधानमन्त्रीबाट वा सरकारबाट संरक्षण पाउँछौँ। यसमा अख्तियारको पनि केही चल्दैन भन्ने कुरा देखियो।’’
अध्यक्ष रेग्मीले अख्तियार प्रमुख समेत सरकारको नीति निर्देशन अनुसार काम कारिन्दाका रुपमा परिचित हुँदै गएको बताए।
अख्तियारका पछिल्ला कदमहरूले अख्तियारको औचित्य छ की छैन भनेर शंका उब्जाएको उनको भनाइ छ। ठूला भ्रष्टाचारका मुद्दाहरु ‘तामेली’ मा राख्दै जाने प्रवृत्तिले अख्तियार दुरुपयोग अनुसन्धान आयोगको औचित्य समाप्त हुने उनको चिन्ता छ।
रेग्मीले राजनीतिक नेतृत्व तहको संलग्नता र नीतिगत निर्णयका नाममा हुने ठूला भ्रष्टाचारका मुद्दामा केन्द्रित रहेर भ्रष्टाचारीहरुमाथि निर्मम कारवाहीको प्रकृया अगाडी बढाउनुपर्ने बताए।
आयल निगमको जग्गा खरिद प्रकरण, वाइडबडी जहाज खरिद प्रकरण, न्यारोबडी जहाज खरिद प्रकरण, नेपाल ट्रस्टको जग्गाहरू यति कम्पनीलाई लिजमा दिएको प्रकरण, सेक्युरिटी प्रेश खरिद सम्बन्धमा तत्कालीन मन्त्रीको अडियो प्रकरणमा कुनै कारवाही नभएको बताए।
त्यस्तै स्वास्थ्य सामाग्री खरिदमा ओम्नी समूहद्वारा गरिएको अनियमिततासम्बन्धी प्रकरणका मुद्दाहरूमा अविलम्ब अनुसन्धान प्रकृया सम्पन्न गरी दोषीहरुलाई कारवाही गर्नुको सट्टा फाइल तामेलीमा राखेर बन्द राखेको प्रति उनले दुःख व्यक्त गरे।
भ्रष्टाचारमा संलग्न दोषीउपर कडा सजायको मागदाबी गरी मुद्दा दायर गर्नुपर्नेमा उल्टै माहामारीको मौका छोपेर गुपचुपमा अर्बौं रुपैयाँभन्दा बढी रकम हिनामिना गर्ने गराउनेलाई उन्मुक्ति दिनेगरी मुद्दाको फाइल गरिएकोप्रति ट्रान्सपरेन्सी इन्टरनेसनलले ध्यानकर्षण गराएको छ।
