अर्जुन सुवेदी, कार्तिक १६, २०७८ | सुनसरी
सुनसरी–मोरङ सिंचाइ आयोजना अन्तर्गत सितागञ्ज नहर शाखामा अनियमितता भएको भन्दै स्थानीय किसानहरु आन्दोलित भएका छन् ।
संस्थाको गतिविधि पारदर्शी नभएको र उपभोक्ता समितिका कुनै पनि सदस्यहरुलाई जानकारी नदिइ कोठे बैठकबाट अध्यक्षले समिति गठन गरेको भन्दै साढे ३ सय स्थानीय किसानले आन्दोलन थालेका हुन् ।
सुनसरीको गढी गाउँपालिकास्थित औराबनीमा आज विरोध प्रदर्शन गर्दै स्थानीयले २०५१ सालदेखि एउटै ब्यक्ति उपभोक्ता समितिको अध्यक्ष बनेर चरम अनियमितता गरेको आरोप लगाएका छन् ।
गत असोज २७ गते सितागञ्ज नहर शाखाको कार्यलयमा तालाबन्दी गरेका स्थानीय किसानले सुनसरी–मोरङ सिंचाइ आयोजनाको कार्यालय र गढी गाउँपालिकामा ज्ञापनपत्र समेत बुझाएका थिए । जलउपभोक्ता समितिको नाममा आएको लाखौँ रुपैयाँ समेत अध्यक्ष तपन कुमार दाशले अनियमितता गरेको उनीहरुको आरोप छ ।
यस्तै, नहरको माटो जथाभावी कटान गरेर बेचेको, २ सय ७२ वटा मेसिन मध्ये २ सय मेसिन गायब बनाएको, वृक्षारोपणको नाममा आएको ७४ लाख रुपैयाँ बजेट समेत अनियमितता गरेको किसानहरुको आरोप छ ।
विभिन्न खेती लगाउने समयमा सिंचाइ सुबिधा समेत नपाइने गरेको भन्दै उनीहरुले तत्काल पारदर्शी किसिमले नयाँ समिति गठन हुनुपर्ने माग गरेका छन् ।
सुनसरीको इटहरीस्थित सुनसरी–मोरङ सिंचाइ आयोजनाको मुख्य नहरदेखि दक्षिणतर्फ इटहरी, दुहबी, गढी र बर्जु गाउँपालिकासम्मको ४० हजार हेक्टर क्षेत्रमा सिंचाइ पुर्याउने सो नहर अध्यक्ष तपन कुमार दासको लापरबाहीले संकटमा परेको सितागञ्ज नहर संघर्ष समितिको दाबी छ ।
