दुहबी / सुनसरीको बर्जु गाउँपालिकामा पौष २२ गते देखि माघ ३ गते सम्मका लागि बर्जु महोत्सवको आयोजना गरेको थियो
बर्जु सामुदायिक विकास केन्द्रले बार्षिक रुपमा बर्जु ताल र चरा पर्यटनका लागि बर्जु महोत्सव आयोजना गर्दै आएकोमा यस बर्ष समेत महोत्सवको आयोजना गरेको थियो पारिवारिक माहोलमा आपसमा रमाइलो साटासाट गनुपर्नेमा मंगलबार भने बर्जु महोत्सवमा झडपको स्थित सृजना भएको थियो ।
बर्जु महोत्सवमा लगातार दोस्रो वर्ष पनि झडप हुँदा त्यहाँको पर्यावरणीय पर्यटनमा नकारात्मक असर परेको छ । मंगलबार दिउँसो बर्जुको चिमडीमा भारतीय भोजपुरी गायक अभिनेता खेसरीलाल यादव आएका बेला प्रहरी एवं स्थानीयबीच झडप भएको स्थानीयवासीको भनाई रहेको छ ।
संयोग कस्तो रह्यो भने, गत वर्ष सञ्चालित बर्जु महोत्सवमा पनि यादवकै कारणले हिंसात्मक घटना भएको थियो । त्यस बेला यादवले प्रयोग गरेको ५ वटा महँगा गाडीहरु जलाएर दर्शकहरुले खरानी बनाएका थिए । यसपटक गत वर्ष जतिको धनमालको क्षति नभएपनि सर्वसाधारण एवं प्रहरी गरेर ५ जना घाईते भएका छन् ।
अघिल्लो वर्षको माघ ४ मा कोरोना महमारीका कारणले जिल्ला प्रशासन कार्यालय सुनसरीले खेसरीलाल यादवलाई महोत्वमा आउनका लागि रोक लगाएपछि आक्रोसीत दर्शकहरुले ढुंगामुढा र आगजनी गरेका थिए । जसका कारणले एक करोड भन्दा बढीको गाडि तथा बिभिन्न उपकरणहरु जलेर खरानीमा परिणत भएको थियो ।
यस पटक माघ ३ मा भने उहाँलाई ल्याएपछि राम्ररी देख्न नपाएको बहानामा झडप सिर्जना भएको छ । खेसरीलाललाई माघ ३ मा २ घण्टा प्रस्तुति दिनका लागि भनेर अग्रिम सम्झौता गर्दै १५ लाख रुपैयाँ दिइसकेको थियो । खेसरीलाल आएकै दिन टिकट बिक्री गर्दा भीड व्यवस्थित हुन नसकेको र उहाँलाई हेर्न नपाएपछि झडपको स्थिति उत्पन्न भएको जिल्ला प्रहरी कार्यालय सुनसरीले जनाएको छ ।
भारतीय दर्शक पनि अत्यधिक आएको र बिहानैदेखि मादक पदार्थ सेवन गर्ने भएकाले अराजक स्थिति उत्पन्न भएको प्रहरीको भनाई रहेको छ । झडपमा तीन प्रहरी सहित ५ जना घाइते भएका छन् । मोरङको धनपाल गाउँपालिका ३ कदमाहा का २५ वर्षीय सीताराम मेहता घाइते भएर हाल विराटनगरको नोबल अस्पतालमा उपचार गराइरहेका छन् ।
झडपमा उत्रेको आरोपमा बर्जु–६ का १८ वर्षीय सुशील चौधरीलाई पक्राउ गरी हिरासतमा राखिएको छ । बर्जु महोत्सवमा भारतीय कलाकार ल्याउने गरेको र अनाधिकृत रुपमा टिकटको शुल्क लिएका कारणले समेत बार्षिक रुपमा बिबाद उत्पन्न हुदै आएको छ ।
बर्जुमा भएको झडपको बिषयमा छानबिन गर्नका लागि समेत स्थानीयवासीले माग गरेका छन् । त्यसैले महोत्सवमा भएको झडपको बिषयमा यर्थात छानविन गरेर दोषी माथि कडा कारवाही गर्नु अहिलेको आवश्यक्ता देखिन्छ । नत्र बार्षिक रुपमा हुने बर्जु महोत्सवमा झडप हुदै जाने हो भने ठुलो आर्थिक तथा भौतिक नोक्सानीको सामना गर्नुपर्ने हुन्छ ।
