विराटनगर, ११ भदौ : विराटनगर महानगरपालिकाको समन्वयमा चन्दा उठाएर खरिद गरिएको पीसीआर मेसिन २० लाख रुपैयाँमात्र पर्नेमा आपूर्तिकर्ताले ८ लाख रुपैयाँ बढाएर २८ लाख रुपैयाँमा खरिद गरेको देखाएका छन् । उक्त मेसिन उद्योगी प्रदीप मुरारकाले छोरा शिशिर मुरारकामार्फत मगाएका हुन् ।
महानगरपालिकामा कोरोना भाइरस संक्रमित व्यक्तिहरुको संख्या दैनिक बढेपछि संकलित स्वाबको रिपोर्ट आउन न्यूनतम् ५ दिन पर्खिनुपर्ने अवस्था सिर्जना भएको थियो ।
सोही अवस्थाको अन्त्यका लागि भन्दै मेयर भीम पराजुलीले पीसीआर मेसिन खरिदका लागि विराटनगरका उद्योगी व्यवसायीसँग छलफल अगाडि बढाएका थिए ।
मेयर पराजुलीकै आग्रहमा विराटनगरका सर्वसाधारण, समाजसेवी, उद्योगी तथा व्यवसायीहरुले चन्दा सहयोग सहयोग जुटाएका हुन् ।
चन्दाबाट उठेको पैसाले मुरारकामार्फत पीसीआर मेसिन खरिद गरिएको हो । खरिदका लागि उद्योगीहरुसमेत रहेको ‘कोभिड राहत कोष’ नामको समिति बनाई बैंकमा छुट्टै खाता खोलेर पैसा जम्मा गरिएको थियो ।
कोसी अस्पतालको ल्याब प्रमुख डाक्टर कामना शर्मा र डाक्टर सुशील तापडियाको सुझाव अनुसार जर्मनमा निर्मित क्वायजेन कम्पनीको ‘रोटर–जेन क्यू ५प्लेक्स एचआरएम सिस्टम’ मोडलको पीसीआर मेसिन खरिद गरिएको हो । सोही मोडलको अर्को मेसिन कोसी अस्पतालमा संचालित छ ।
एउटा मेसिनमा कुनै समस्या आए तुरुन्तै स्वाबलाई अर्को मेसिनमा राखेर परीक्षण गर्न सकिने र परीक्षण नरोकिने भएकोले उनीहरुले सोही मोडेलको पीसीआर किन्नु उपयुक्त हुने सुझाव दिएका थिए ।
मेसिन खरिदका लागि भएको छलफलमा उक्त पीसीआर मेसिन तत्कालै कसले दिनसक्छ भनि सोधिखोजी गर्दा उद्योग संगठनका उपाध्यक्षसमेत रहेका प्रदीप मुरारकाले ‘म दिनसक्छु, सस्तोमा दिनसक्छु’ भनेर कबोल गरेका थिए ।
विराटनगरका केहि उद्योगीहरुले पीसीआर मेसिन खरिदका लागि चन्दा सहयोग बुझाउन थालेपछि मुरारकाले पनि पाँच लाख रुपैयाँ चन्दा पनि दिने भनेका थिए । उनले सो मेसिन छोरा शिशिरमार्फत झिकाएका हुन् ।
शिशिरलाई मेसिन खरीदमा उनकै साथी काठमाडौं निबासी राजीब बाजोरियाले सघाएका हुन् । शिशिर र राजीब काठमाडौंमा बसेर मेडिकल उपकरणहरुको आयात गर्ने र बिक्री गर्ने कार्यमा संलग्न रहेका छन् ।
मुरारकामार्फत खरिद गरिएको उक्त पीसीआर मेसिन महानगरपालिकालाई सोमबार हस्तान्तरण गरिएको थियो ।
उक्त मेसिनलाई तत्कालै कोसी अस्पतालको ल्याबमा जडान गरी सोही दिनदेखि संचालनसमेत गरिसकेको कोसी अस्पतालका मेडिकल सुपरिटेण्डेन्ट डा.चुमनलाल दासले बताए ।
पीसीआर मेसिन हस्तान्तरण कार्यक्रममा त्यसको मुल्य २८ लाख रुपैयाँ परेको भनि सुनाइएको थियो ।
मुरारकामार्फत खरिद गरिएको उक्त पीसीआर मेसिनको बिल मुल्य भने भ्याटसहित ३१ लाख ६४ हजार रुपैयाँ उल्लेख छ । महानगरपालिकालाई बुझाइएको बिल ‘जेएचएस एनालाइटिक ट्रेडर्स भाटभटेनी काठमाडौं’ को नामबाट काटिएको छ ।
जेएचएस एनालाइटिक ट्रेडर्सले विराटनगर महानगरपालिकामा बुझाएको भ्याटसहित ३१ लाख ६४ हजारको बिल ।
मेसिन निर्माता कम्पनी क्वायजेनले भने उक्त मेसिनको बिक्री मूल्य (लिष्ट प्राइस) भारु १७ लाख १७ हजार ८ सय ३० रुपैयाँ र छुट मुल्य (स्पेसल प्राइस) भारु १२ लाख ५० हजार रहेको उल्लेख गरेको छ । छुट मुल्य अनुसार मेसिनको मुल्य नेपाली २० लाख रुपैयाँ हुन जान्छ ।
तर महानगरपालिकालाई उक्त मेसिनको खुद मुल्य २८ लाख रुपैयाँ परेको र त्यसको भ्याटसहित ३१ लाख ६४ हजार रुपैयाँको बिल बुझाइएको हो ।
उत्पादक कम्पनिले नै २० लाख रुपैयाँ पर्ने भनेको पीसीआर मेसिनको मुल्य २८ लाख रुपैयाँ परेको देखाएर मुरारकाले पाँच लाख रुपैयाँ चन्दा सहयोग गरेको भन्दै प्रचार गराएको पाइएको हो ।
पीसीआर मेसिन निर्माता कम्पनि क्वायजेनले पठाएको छुट रकमसहितको स्टिमेट बिल ।
मेसिनको ढुवानी लगायतका कार्यमा केही रकम खर्च हुनसक्ने भएपनि बाँकी रहने ३ लाख रुपैयाँ उनले खल्तीमा हालेका छन् ।
सामाजिक काममा चन्दा सहयोग गर्ने लिष्टमा नाम नसुनिने मुरारकाले पीसीआर मेसिन खरिदमा पाँच लाख रुपैयाँ ‘चन्दा दिए’ भन्दा विराटनगरका अधिकांश उद्योगी व्यवसायीहरुले आश्चर्य मानेका छन् ।
विराटनगर महानगरपालिकाका मेयर भीम पराजुलीले भने सोही मेसिन मुरारकाले वीरगञ्ज महानगरपालिकालाई ४० लाखमा बिक्री गरेको बताए । विराटनगरलाई सस्तोमा उपलब्ध भएको उनले दाबी गरे । उदघोष दैनिकबाट साभार
