फाईल तस्विर
सुनसरी / राजस्व अनुसन्धान विभागले जयबाबा इँटा उद्योगविरुद्ध ६ करोड ७८ लाख बिगो कायम हुनेगरी उच्च अदालत विराटनगरमा मुद्दा दायर गरेको छ ।
राजस्व चुहावट गरेको अभियोगमा विराटनगरस्थित उद्योगका सञ्चालक खगेन्द्र श्रेष्ठ र धर्मेन्द्र श्रेष्ठविरुद्ध मुद्दा दायर गरेको राजस्व अनुसधानका सूचना अधिकारी नवराज अधिकारीले जानकारी दिए । उनीहरूलाई कैद सजायसमेत माग गरिएको छ ।
विभागका अनुसार कानुनतः ६ करोडभन्दा बढी बिगो कायम भएमा १ वर्षदेखि ३ वर्ष कैद सजाय हुने छ । विभागले हदैसम्मको कैद माग गरेर हिजो उच्च अदालतमा मुद्दा दर्ता गरेको सूचना अधिकारी नवराजले जानकारी दिए । राजस्व कार्यालय इटहरीले उद्योगमा छापा मारेर अनुसन्धान प्रारम्भ गरेको थियो ।
अनुसन्धानका क्रममा इँटा बिक्री गर्दा ग्राहकलाई सादा बिल दिएर आयकर र मूल्य अभिवृद्धि कर भ्याट छलेको अभियोग पत्रमा उल्लेख छ । ‘मुख्यतः गैर कर बिजक प्रयोग गरेको देखियो,’ उनले भने । कानुनतः कार्यालयले अनुसन्धान गरे पनि मुद्दा दायर गर्न विभागले स्वीकृति प्रदान गर्नुपर्छ ।
ई कान्तिपुर बाट ।
